Wednesday, May 02, 2007

تاج و داير على الكل






الله يكرمها رجعتلنا رجوع رائع و كله خيرات

و التاج ده جايلنا على الهواء مباشرة من الانسة وينكى المحبوبة من الجميع

عاشقة الشيكولاتة



***************************************



هل كنت طالب شاطر فى المدرسة ؟
بصراحة فى الابتدائى و الاعدادى بس لكن الثانوى بقى ماليش ذنب فيها


أنا كنت ولد زى كل الولاد فى مرحلة مراهقة يعنى أعمل أيه ألتفت لمذاكرتى و لا لهرموناتى اللى بتقطعنى من جوه و لا لمتشات الكورة اللى مابحبهاش و لا لمعاكسة البنات

بس كنت الاول فى الابتدائى و بعد كده أنهرت فى المراحل التالية

أما الجامعة و بالرغم من أنكم ما مسألتوش عنها فأنا و الحمد لله أتفصلت من كليتى الاولى بعد سنتين لفشلى للأسف و رحت كليتى التانية اللى خلصتها بتفوق جيد جداً

و كفاية فضايح الله يتر علينا و عليكم


***
أحب مادة , أكره مادة ؟
الانجليزى و الرسم طبعاً


لأنى كنت متفوق فى الانجليزى و مازلت و الحمدلله حتى الان

انا فى الأبتدائى كنت بقرأ روايات بالأنجليزى

أه روايات بسيطة بس كنت أحسن من غيرى كتير

أما الرسم فده كان عشقى بموت فيه جداً

و دايماًكنت متفوق فيه و مشارك فى جماعة الرسم و الصحافة



أما المادة اللى بكرها فكانت الرياضيات و الفيزياء

الله يخرب بيوتهم

بكرهم

بكرهم

بكرهم


***
كنت عايز تطلع ايه وانت صغير ؟


فى الطفولة كان نفسى أكون عالم فلك و لما درست فيزياء و كرهتها

و كنت بحب الرسم و التصاميم

بقى نفسى أكون مهندس ديكور

بس للأسف مجموعى ماجبش فى الثانوية العامة فنون جميلة بالرغم من أنى نجحت فى القدرات





نستنتج من ذلك فشل نظام التعليم فى مصر


***
أمرر التاج إلى
لكل واحد وواحدة سواء بيقرأ و لا يعلق


أو بيعلق بس

أو ليه لينك عندى

أو ليا لينك عنده

أو حتى فتح المدونة هنا بالصدفة